السلام عليكم شبااااب وبناااات
اليوم بروحتي لـ وزارة التربية .. وبالواسطة وبالفلوس قدرت احصل ألكم على نسخة من الاسئلة الوزارية لـ هذه السنة .. يعني الجاية مو الرايحة !!
المهم اريد انطيكم ياها بس لا تعلمون اني منزلها الكم على النت .. لان اخاف من المحاسبة القانونية ... وانتو تدرون .. خالي قوات الجيش والشرطة ابد ما يعجبها تعتقل احد وتعذبه على صغيرة وجبيرة !!!
الله يسترها مع الكل !!
زين ... نرجع ع الموضوع .. وزير التربية نطاني هذه النسخة وكال انه هذه النسخة محد يعرف بيها غير اني وياه والي كتبها << مدرس خبير بالفيزياء التحشيشية .. اسمه الاستاد عبد الجدر خاشوكة ؛؛
اي يابة وما نطول عليكم ؛؛ ونخليكم ان شاء الله تلاقون الحلول ..
==============================
جمهورية العراق
وزارة التربيه
الاسئله الوزاريه للعام الدراسي الحالي
الفيزياء
الوقت :3ايام
ملاحظه :الاجابه على ستة اسئله على ان يكون الاول والثاني والثالث والرابع والخامس والسادس من ضمنها..
السؤال الاول :رواد فضاء صعدوا الى الفضاء واخذو معم ثلاجه بيهه اكل وعلى مسافة كيلو ونص من القمر خلص الاكل وشمروا الثلاجه مناك ..احسب سرعة سقوط الثلاجه علما ان الماطور دنفص
..
السؤال الثاني :واحد ديمشي هوه وصديقه يعني هوه ديمشي ووراه صديقه والمسافه بينه وبين صديقه متران فقط ..التفت الى الوراء بعد مرور 10 ثوان ولم يجد صديقه ..اين ذهب صديقه؟
السؤال الثالث:سياره تمشي عالقناه نوع اوبل اومكا بسرعة 120 كم / سا صادف مرور كلب سائب امامها على مسافة 20 مترا من السياره ..داس السايق بريك فوقفت السياره على مسافة 2 متر من الكلب لتخافون ما راح اسألكم شنو نوع الدهن بريك....اجتي سياره همر مال امريكان ضربت الاوبل من وره ..شكد جان يمشي ابو الهمر؟ علما ان الجندي السايق من ولاية اريزونا الامريكيه..
السؤال الرابع:ولد يمشي في شارع الربيعي على الجهه اليمنه وبنيه على الجهه اليسره من الشارع انتبه الولد عالبنيه واندعم بتيل .. البنيه ضحكت ..كم عدد البنات صديقات هاي البنيه اللي راح هاي البنيه اتسولفلهن الصار بالولد من وراهه؟ علما ان الولد مضروب بوري قبل 20دقيقه في نفس الشارع؟
السؤال الخامس :ارسم مؤشرا على الاجزاء طريقة عمل الدولمه..
السؤال الاسادس والاخير:
علل ما ياتي:
1:السوني اركسون يخلص شحن بسرعه..
2:المولده التايكر تطلع دخان..
3:لايوضع الصاص والعمبه معا في لفة الفلافل..
4:الفقير ما يعيش بالدنيه..
بس شباب لخاطر الله الي يعرف يجاوب على اي سؤال يحط الاجابة اهنانا على مود الباقين همينة ينجحون والكل تجيب مجاميع حلوة وتحصل كليات طاكة !!
لا من .... راح تجيبون مجاميع ... نصيحة مني ألكم بطلو وكعدو قشروا بصل مع الماما وساعدوها بالدولمة والكبب وبالكنس والمسح احسن الكم من دوخة الوزاري !!
لوحة الشرف
العرض العادي
