لو تدري يا روحي آنة شكــثر أفكــــر بيــــك
و ضنيت أكدر انســاك بس ضنوني خــابَــــنْ
و بعده لـساني ما نطق كــــلمة النسيـــــان
وقفْ نبض القلب و عيوني دمــوع غِرقَنْ
ليش القلب ينبض حيل من أذكر اسمك؟؟!
و ليش من اكول انساك ايدية اثنينها يرجفنْ؟؟
فكرت ساعات و سألت نفسي هالســــؤال !!
و ضليت آنة افكر أيام و ليالِ و بيك أصفنْ
اثاريك يا روحي انت لأوردة القلــــب دمـــها
و بدونك يا محبوبي أوردة بلا دم يمـــــــوتنْ
و اثاريك انت لعيوني يا عــــــيوني نظرهــــــا
و من تغيب إنتَ عنها يا نظرها عيوني يِعْمَـــنْ
من كثر ما افكر بيك ترا التفكير مَــــلْ منــي
و مليت من نفسي و روحي و منك هنَّ ما ملّنْ
أذكرك يا عمري صبح و ضهر و عصر و مسية
و انت الحلم اليمر بمنامي من جفوني يِغفـــَـــنْ
قررت أطلع من البيت و أحاول أنسى كلشـــي
قرار عقلي و الارادة عليه اثنينهم عِزْمـــَـــنْ
و طلعت امشي تايه و محتار و همومي تَعِّبَـنِـــي
شفت طيور بالسما حلوات و من الفرح يْغَــرْدَنْ
و تذكرتك من تنادي و تكلي يا حبيب الروح وينك؟
نفس صوت هاي الطيور و بنفس اللحن البيه غَنَّــنْ
و شوية امشي و شفت بستان بيه الزهــــر ألوان
وألوان الورد حلوات تزهي و تغري و لعيوني جِذْبَـنْ
يا ورد القرنفل تدريني احبــك موووت و اهـــــــواك
و تدريني انسى همـــوم دنياي باوراقــــك اليزهنْ
جاي اليوم اشكيلك انا حالي و همــــوم كتــــالة
واشكيلك قلب مقهور و عيون من البجي إبْيَّضَّنْ
هِمَس ورد القرنفل باذني بصــــوت مشـــــتاق
و كال ترا كل جذوري و اغصاني لجيتك وُكْفَـــنْ
وينك طول علية غيابك و تدريني أحبـك يالتحبني
كل اوراقي كامت من اجيت و صاحت أهــــــلاً
و بقى ورد القرنفل يحاجيني وآنَة أسْمَع كَلامه
و من بين الكلام كلي الاوراد عَلى محبوبك يِسِألَــنْ
اثاري يا روحي حتى الورد يذكرك و مثلي يحن لك
و غصون الورد لايديك الناعمة تلامسه إشتاقَــنْ
و عطرك أحلى من عطر الورد و الزهر يــدري
و من عطرك الفواح يا محبوبي الازهار غَارنْ
لا تزيد الالم البقلبي يا قرنفل دخيلك كافــــــي !!
ذكرتني من ايدين الحلو لخدودي يِلِمْسَــــــنْ
و ذكرتني بشفافه اللي يحتار الشِعِر بيــــها
و بخدوده المثل حمرة الرمان و اكثر إحمَرْنْ
هسة افهمت انا مثل حالك يا قرنفل و حال جذرك
بليا جذر ما تصبر و أزهارك الحلوات يِِـيِـبـْسـَنْ
و بلية محبوبي ترا نفس حالك يا قرنفل أصير
لو اموت من القهر بعد فراكه للغالي لو أنجنْ
و قررت ارد لداري تعبت عيوني من النـُــوحْ
و أرِّيحْ أقدامي اللي من حمــــل همـــي تعبنْ
و سمعت صوت الكناري جن لحنه بجي مهموم
و حطت على الكـــاع الطيور و نادتني صبراً
يا الحزين تدري حزنك حَرَّك بينا المشاعر؟
و كل طيور البســـما على حالك ترا يــبجنْ
كثر بجاك دمرنا و لحن تغريدنا مــوال صــار
عفنا الاغاني وعلى حالك يالتحبنا ترانا نوِّنْ
لا بد نروح لمحبوبك الساعة و نكله على حالك
و لا بد يردلك من يعرف البيك و قلبه عليك يِحِنْ
يا طيور التسمعوني روحوا لبيت محبوبي أمانة
و رسالة بدم القلب اكتبها و بشوقي اله أخْـــذَنْ
عنوان الرسالة أحبك و بُعْدك جرحني يا روحي
و جروح اللي بية ترا من ألـــم جرحــــك إزدادَنْ
و يا طير الكــــــناري من توصل المحــبوب كله
ترا عمري ساعات على اصابع إيــدي يِنْعدنْ
ساعة اكلك بيها أحبك و أعشــقك و أهـــواك
و ساعة أحضنك و شفافك على خدودي ينطبعنْ
و ساعة امشط شعرك الاسود يا روحي بِديَّـــة
و ساعة راسك على جتافي و عــيونك يْغَمْضَنْ
و بقى بالعمر ساعة يلي أهــواك علــــيك الله
الحك علية بساع يا محبوبي لو تلكاني مجفنْ

رعد الشاهر
2-2-2008

أوردة القلب = جمع وريد
لعيوني جذبن = جذب الشئ ... شي جميل يجذب الناظر اليه ...
غارن = من الغيرة ... شخص يغار من شخص اخر لشئ معين ...
ييبسن = يباس الشئ ... اصبح يابسا ..
جن = كأنه...
موال = مقدمة الاغنية الحزينة ...
النوح= يأن من الحزن ... يبكي بحزن و الم
نوِّن = يأن من الحزن و الالم ..
مجفن = مكفن .. موضوع في الكفن

ابداع × ابداع
الكلمات قمه بروعهـ ,,,
صح السانكـ,,
و انتظر جديد كـ,,
ودمت بحفظ العزيز,,