ماحاجيك ابد بالعشك مهما يصير
وبس كلمة صداقه البيني وبينك

بعد ماغار ابد ماتسوه اغار اعليك
كراج كليبك انت والله اليعينك

يوميه تحب افلان وابن افلان
شيخصني بعد حـُـر انت بسنينك

تذبحني بغرورك انـــــــــــــه وانــــــــه تكــول
بس كبالي ثاري تشيل سجينك ! ِ

وكبال الغريب اتصير ناعم دوم
حساس ومحب من فدوه يازينك

تشرين انت طبعك زخ مطر وياي
ووي غيري ربيع يصير تشرينك

ضايع انت ضايع بين زين وشين
وضعنه وياك احنه بزينك وشينك

ما انكر جمالك انت احله انسان
طولك .. مشيتك .. وك حته رجلينك

حسنك ..طلتك ..واحساسك الجياش
لمساتك ..حنانك .. رقة ايدينك

وعينك .. شرد اكلك اني بعينك
يا اطيب عطر فاحت رياحينك

تره كلبي انشلع من كثر طيبي وياك
ياكلبي التودهم ليش ناسينك ؟؟

لاتزعل ابد من الصراحه ارجوك
لاتزعل تره وحلفتك بدينك

اختار انت روح بكيفك انت اختار
واذا ماجيت ما اكلك ابد وينك

وما حاجيك ابد بالعشك مهما يصير
وبس كلمة صداقه البيني وبينك
بس كلمة صداقة البيني وبينك ..........


انشاءالله تعجبكم تحياتي اخوكم ابن العراق الجريح

أليوم انت مو بس مبدع
وصاحب قلم متميز
اليوم انت كتلة من الاحساس
والرومانسية والشجن
اليوم أحساسك فوق العادة
وكلماتك حيل مؤثرة
وقريبة من القلب
دمت بهذا التميز
تقبل مروري
وتحياتي