مغامرات هاتف

مرحبا بجميع اعضاء انت عراقي
هذه قصة اليوم كتبتها انا عن شخص يدعى هاتف
هوه عايش بالموصل ومعروف بجذبه
حبيت اكتب الكم من خياله وخيالي اني << شنو ثننيكم جذابين ؟؟

-------------------------------

في ايام الحرب على العراق وجانت الطائرات تجي تقصف المواقع العسكريه وكل ما تشوفه يمشي
جان هاتف ضايج وطالعه روحه وشارب بطل عرك العصريه وفاقد وما يعرف وين يولي
المهم كال خلي اطلع على شويه على طريق صحراوي اخذلي فره بلكي اشوف حاته (بنت) اكضي اليوم براسها
طلع على الطريق وديمشي 120 \كم
سمع صوت طياره فوكه تطير
كال اهووو هسه هذا شجابه هنا شنو عباله اني قائد قوات ذيج الصفحة ودامشي هنا
المهم هوه وديمشي ما سمع الا صوت انطلاق صاروخ من الطياره
كال هذا ملعون الوالدين يريد يلعب مع هاتف
والا لسمط ابوه واشوفه شنو هاتف
اول من وصله الصاوخ هوه راح لليسرى ما طخه الصاروخ<< شكله عباله ساسوكي عراقي

الطيار ضاج وطلعت روحه وجان يسمطه بصاروخ ثاني وهم هاتف راح لليمنى وانضرب بالرصيف شلع ابو الرصيف
وهاتف يضحك يكوله يول ابن الامريكيه الا اخليك تسنى اليوم الي اجيت بيه
وكل ما يضربه بصاروخ هذا يبعد عنه وما يطخه
بالاخيير الطيار طلعت روحه وينزل الطياره الى الشارع يطير بيها بصف سياره هاتف
ويطلع راسه من الشباك
ويكول اله ولك هاتف خرب عرضك هاي شنو انت من شي والعباس دوختني وخلصت صواريخي
جان هاتف يكله روح بابا العب بعيد والفضل لو ما اكول عليك خطيه جان اطلع النص اخمس ازرفك تزرف
بس لخاطر جهالك راح اعوفك
المهم الطيار انطها ثاني وطلع كبل على امريكا
وبقى هاتف يمشي ومشغل ابو خالد ( لا يولدي تدري الكبر هدني) وفاقد اخر فقود
جان عللى غفله يشوف حماوه السياره كامت تفور
كال اويلي هسه انتي وكتج بتل الاوادم
المهم وكف السياره على الطريق وهوه بصحراء وما عنده مي بالسياره
كال اوف شلون بلوه هسه اني وين اولي واجيب ميي
المهم فتح صندوك السياره جان يتذكر ناسي صندوك حليب جان جايبه للجهال وناسيه بالصندوك
كال اوف جاك الفرج يا هاتف
وكام وفرغ كل الحليب بالراديتر مال السياره
وشغل السياره شافها اشتغلت تووب
بس حس بصوت السياره شوي متغير
فراح هوه وديسد الصندوك
وشاف من الكزوز يطلع شي غريب
باوع عليه زين وصفن
جان يشوف الكزوز يطلع جبن مثلثات<< الاخ بربه شاطر اعظم ساحر ههههههه
كال اوووف لو تدري يا هاتف مو جان هسه انت اكبر تاجر مال اجبان بالعراق
بس يله يصير خير بس اعبر المنطقه الصحراويه هاي واني اتصرف
شغل السياره ويمشي وابو خالد صوته يركع بالشارع وهوه سكران وفاقد ومنطلق وياه
وبقى يمشي نص ساعه شاف ثنين شباب بالصحراء
انقهر عليهم طبعاً كال خلي اسوي زين اليوم واشيل هذوله بلكي الله يغفرلي
وهوه فاقد طبعاً
اول من وكف كال شبيكم وليش انتوا هنا
كالو اله يابه جنا دنتمشى اني وصديقي وسالفه اتجر سالفه ما حسينا نفسنا الا هنا
كال يابه الله يساعدكم هاي الشغله اتصير
اني هم مره نزلت داسبح بالنهر وكاعد اسبح شو اباوع على نفسي بخليج المكسيك << يريد يشوفهم عضلاته
المهم صعدوا وياه وديمشون بالسياره وهوه طبعاً طفى ابو خالد كال لا هذوله عبالهم اني مثل ابو خالد ويشلعون مني
وبقى يمشي شويه وسالفه اتجر جذبه وجذبه اتجر نكته شو على غفله واحد من هذوله طلع سجينه ام الحلقه
كله لهتاف
ولك انزل من السياره << طلعوا سلابه
باوع عليه هاتف بتك عين وعوج حلكه
كله بشرفكم انتوا عفتوا الدنيا كلها وجايين على هاتف اتسلبوه
ولكم طيارات امريكا ما كدرت عليه
جايين انتوا ثنين مخربطين يريدون يسلبون سياره هاتف
والفضل اذا ما نزلتوا هسه من السياره لسمط ابو ابوكم
جان الي كاعد وره خله السجينه على رقبه هاتف كله انزل ولك لا اخربط وجهك والعباس
هاتف كله ولك عوف القميص اليوم غاسله شبيك انت شو سويتوها جديات مو جنا نشاقه <<< طبعاً هنا خرط هاتف
كلمه من هنا وكلمه من هنا جان يباوع عليه الي كاعد يمه
كله ولك انت هاتف ؟؟!
الي جنت ويايه بالمدرسه وجنا انبوك الكتب من الطلاب وانسويهم مال حب شمس وانبيعهم
كله هلاااااا بستار ولك اي اي اني هذا الي جانت المدرسه كلها اتضوج من عدنا
كله هلا والله هاتف ولك بعدك تجذب لحد هسه << طلعوا عرف وعدهم سوابق وخمط من زمان
كله لصديقه لوره ولك عوف ايدك منه هذا صاحبي
المهم الوره شال ايده كال اهووووووو شلون خمطه عاويه انسمط ابونا بالشمس بالاخير يطلع عرف
وكعدو يسولفون عن الايام الي راحت وذكرياتهم وهاتف طبعاً حجالهم على بطولاته ويه الطيار الامريكي ونزلو من السياره شوفهم الجبن المثلثات
واكلو من الجبن ولو شويه بيه دهن بريك بس هذا ما يمنع يكون طيب بالصحراء
بعدين كالو اله يابه رجعنا للمكان الي جنا بيه بلكي الله يرزقنا بواحد عاطل مثلك ونخمطه
وجان يرجعهم هاتف الى مكانهم وهوه هم شويه صحه على نفسه من الفقود
ورجع على البيت واول من فات شاف مرته كاعده مقابيله باوع على وجهها جنها جدته من تضحك
كال خرب عمي لو باقي فاقد وستار خامطني بطلقه بالكوع مو احسن من رجعت للبيت
وكبل طلع للبيت وراح لدكانه يبيع فلافل

هذي احد مغامرات هاتف

وان شاء الله نلتقي في المزيد من المغامرات الشيقه


اخوكم رامي

تيبـ ليش عود هآتفـ إسمهـ،؟


ليش مو تلفونـ لو موبآيل مثلاً؟


<< قمـ بس قمـ



خ ـيـــوو رآمي



ح ـلوهـ وآللهـ وإستمتعتـ بيهــآ ،



إنـ شآء آللهـ، تكمـــل للحلقهـ آلـ907 تـ3



ودي :)

عاشت ايدك رافي

مرررة حلوه

الله يعطيك العافيه

لاهنت