رسالة حب حقيقية محششة على الاخير

**وطن الغربة** · 04-27-2008, 08:20 PM

(( إعذريني ياغاليه لو نشرت قصتنا على الناس لأن مابقت بالإيد حيله وماأعرف إنتي وين إختفيتي لعل توصلج رسالتي هذي فد يوم وعالأقل تتصلين وتعرفين آني لحد الآن أحبج و منتضرج ))) ...............................: هاي وينج ياسوسه صحيح هيجي تنسين العشره الطويله بسرعه؟. أبد منسيتج صدكيني حتى من أحضان الغربه أكتبلج رحت للغربه جنت أتصور راح أنساج بس صار العكس صرت أفكر بيج أكثر من قبل وصرت أتمنى أرجع رغم ضروف بلدي حتى أشو فج ... شهور طويله أفكر بيج هم أرجع وأشوفج ؟! ماأصدك ؟! هم أسمع صوتج ؟! ماأصدك ؟! صحيح الصار بعض منه ذنبي بس مو كله وتره أكو هوايه أشياء إنتي متعرفيهه ياريت لو ألكاج أخليج تصدكين بالحقيقه مثل ماخلاج خطيبج تصدكين بالكذب وأكو شي لازم تعرفيه : تره هو إجاني ودزلي ولد عمه قبل ليصر أي شي وقبل لتصير مشكلة التليفون من خابرتج وهو جان كاعد يمج ... وحجالي على كل شي وكلي أريد الصور حتى أكول الأبويه وللساده والشيوخ إللي خطبولي هاي عدهه ماضي حتى أعوفهه !! وآني رفضت ... حتى أعوفج تعيشين بسلام لأن جنت واثق ومتأكد إنتي ترجعين الأهلج لان ماكو شخص يكدر يتحمل أمج وطلباتهه ومشاكلهه بأقل من سنه .. إنتي مو بس إتخلين اللوم عليه .. ولو مرات أكول حقج لأن سمعتي من طرف واحد وهو صورلج العكس حتى تصيرين بس إله .. وهسه عافج لا إله ولا إلي يجوز جان شي سهل بالنسبه إله !. بس بالنسبه إلي جان عليه أصعب شي مر عليه .. شوفي الخطأ وين و إنتي ب 4 سنين إنخطبتي 7 مرات .. 4 مرات إنخطبتي وفسختي .. و 3 مرات عقدتي وطلكتي !! وتكول أمج أريد نصيب زين البنتي .. هو هذا النصيب الزين اللي تريده الأم البتهه ؟؟ تكدرين تكليلي شنو السبب ؟. .. طبعا أمج هي سبب كل المشاكل . صار 9 سنوات أعرفج بيهه لو جان زوجتج أمج من أول واحد خطبج جان هسه إحنا ناسين بعضنا وكل واحد من عدنه راح إزوج وعنده أطفال .. ليش لحد هسه إحنا بلا زواج ؟.. عسى كلمن فرقنا لاتوصل صلاته ولا يهداله بال ولا ألله يسمع منه دعاء وعسى نار جهنم هي داره و عساه مينام ليله مثل ماخلاني طول هاي الفتره أسهر وأفكر بيج ومشتاقلج اللهم يارب آمين بجاه رسولك محمد هي أمج الضالمه الحقيره إللي ركضت وره الفلوس تصور هي الفلوس راح تسعد بتهه خلي الفلوس تسعد أمج المصلحيه اللي جانت سبب بوفاة أخوج الطفل من وره الفلوس على مود كم لتر بانزين .. وين تروح من عذاب الله .. باعتج وإشترتج وياريت إشترتج لأجل سعادتج !! لا والله لأجلهه هي على مود هذا عنده محل وهذا عنده بيت وهذا بالخارج وهذا عنده سياره وهذا عنده فلوس .. كضت وكتهه أمج تنطيج الهذا وذاك ومن تلكه اليدفع أحسن تنطيج إله ... هيجي باعتج وإشترتج أمج في سبيل الفلوس ... فكري بنفسج زين لشوكت راح تبقين هيج قطار العمر راح يفوت وبعد كل هذا لحد هاي اللحضه آني أحبج وأتخيل يجي يوم نرجع نمشي سوه وهم أخاف لنفترك مره ثانيه .. آني أريدج للأبد وإنتي تعرفين حبي إلج أحاول ماأنساج رغم معاناتي ... مشتاقلج ياغاليه على كلبي ياأغلى مني شفتج آخر مره 2006 شهر 4 يعني صار سنه وتسع شهور مشايفج ... بعد ماجنت أشوفج الصبح من أوصلج للكليه وأشوفج الضهر من آخذج من الكليه وأشوفج العصر بالسطح وبعدين أشوفج من نروح للسوك آني وياج وأمج يعني جنت أشوفج باليوم 4 مرات وهسه صار سنه ونص مشايفج هاي من عدا جنه نتخابر كل شويه . تصوري شلون آني صبرت ؟! وشلون تريدين أنسه ؟! الله يساعدني على هاي الفاجعه . والمشكله هي : إنتو شلتو ماأعرف إنتي وين قريبه ؟ لو بعيده ؟ بغداد لو محافظات ؟ ضليت أفكر وأسأل نفسي هم شافتني فد يوم وعبرتني وآني مشفتهه ؟ لو هم مثلي مشايفتني كل هاي الفتره ؟ هم مشتاقتلي مثل ماآني مشتاقلهه ؟.. وينج ياعمري إنتي لاحس لاخبر لامسج لامسكول ولا حتى رنه من أي تليفون غريب حتى أصبر نفسي وأكول يمكن هي ! صرت أباوع بالوجوه أكول بلكت أشوفهه بس إنتي ماكو وين رحتي ؟؟ بس لو أعرف إنتي وين والله أجي حتى لو منطقتكم خطره والله أجي بس وينج ......... هيه هاي منجزات أمج إللي حتى جانت تطلع ويانه وتعرف بكلشي وتكلي : ( إلك البنيه إلك ) .. حتى إخوتج وخواتج يعرفون وكل الناس مرات أتهرب من أصدقائي من يسألوني عنج بس إلى متى الهروب والصبر ؟ والله مره سألوني : إنت جنت متزوجهه ؟! بكد ماجانو يشوفونه سوه الصبح والظهر وبليل ... أثاري آني جنت نايم بالعسل وأكول هي إلي وآني إلهه .. ومن إجيت أخطبج كشرت أمج سنونهه مثل (الجلب ) وتريد مني ( بيت ملك ) ... ولازم موظف .. وهدت كل مابنيته بتسع سنين .. هسه الوظيفه صارت بس بعديش ؟. بعد ماتفاركنا .. بس البيت إمنين أجيبه ؟.. بس جان أمج يزيدهه الشرف أن أخطب بتهه لأن على الأقل آني مو ( حواسم ) ممديت إيدي للحرام و لو سويت هذا الشي جان إنتي هسه زوجتي من زمان بس الشريف محد يريده .. عسى أن تكون أمج بقعر جهنم مثل ماحرمتنا من بعضنا هاي أمج إللي نست كم مره وديتهه محلات سهام العبيدي . ونست كم مليون مره وديتهه للسوك . ونست كم الف مره وديتهه لدائرة التقاعد . ونست كم عشرين مره وديتهه للمركز حتى تبدلون بطاقة السكن . ونست كم مرات وديته حتى تنقلون بطاقة التموينيه . ونست كم مره وديتهه للبداله حتى تنقل التليفون . ونست من حطيت غراضكم وشلتهه بسيارتي من شلتو أول مره . ونست من دخلت البيتكم وعرضت نفسي للخطر من دخلو عصابه عليكم . ونست كم مره وديت أبوج للمستشفى . ونست أمج من وكفت بفاتحة أبوج . ونست من وكفت بعرس أخوج . ونست كم مره وديتهه للمستشفى ونست كم مره وصلتهه وجبتهه من الدوام . ونست كم مره وصلت إخوانج وخواتج . ونست غيرهه وغيرهه . كل هاي بسيارتي بالبرد والحر وأخوتج نايمين عالحاضر ( والله كل من راح يسمع بهذا راح يضحك عليه ) يعني لهذا الحد آني مغفل ؟ آني أشكر أهلي لأن ربوني بهذا الشكل حتى أنام مضلوم ولاضالم .... رغم كل ماصار آني أحبج حب ماعرفه إنسان ولا نطقه لسان .. أذكر مره كلتيلي : ( أحبك وماعندي غيرك ) بهاي الأحداث اللي صارت حسيت هذا الكلام جان ماإله أي قيمه عندج من كلتيه ومن سألتج ليش وافقتي بالخطوبه كلتيلي أمي . يعني إنتي هم خذلتيني بهذا موقفج الضعيف تجاهي .. ومره كلي الحجي : ( تره هي تريدك وطلبت مني أن أحجي ويه أمهه وحجيت ويه أمهه بس أمهه مقبلت ) .. وحتى زوج أختج كلي نفس الكلام ... هذا الصار وتفرقنا بسبب وبلا سبب وبقيت منتضر اللحضه اللي راح أشوفج بيهه .. شراح تكول عيونج من تشوفني ؟ وشلون راح كلبج يدك ؟ راح تجين وتحاجيني لو تعبرين وكان متعرفيني ..؟ وتسوين نفسج ناسيتني ؟ هيج آني أحبج وإنتي ناسيتني ؟ زين وليش آني متحمل لهذا الحد ؟ لازم أكو شي يخليني أتمسك بيج وأحبج أكيد عندج كلب تمساح من يلزم بشر أبد ميرحمه ... مرات أفوت من يم الكليه أذكر الأيام الذهبيه الحلوه الكضيناها هناك أذكر من جنت أجي وآخذج الصبح‎ ‎من البيت والدنيا بارده وأوديج للكليه وحبنا يدفينه وناكل جبن وصمون وجاي بسياره وبعدين تكولين : أريد أروح لان المحاضره بدت . و تروحين ساعه تسعه إلا ربع وبعدهه أجي آخذج ساعه وحده الضهر ونروح ناكل همبركر وببسي مره عليج ومره عليه . أحس ينشلع كلبي من أذكر ذيج الأيام أكول هم جان يجي يوم وهيج يصير بينه بلكت أكون بحلم وأصحه منه أفوت مره مرتين من يم الكليه أكول هسه تنتضرني باب الكليه أتخيلج واكفه بس الحقيقه إنتي ماكو ماكو ماكو ماكو سوس حياتي أحبج وين إنتي أكيد الشمس تشوفج والكمر يشوفج بس شلون أسألهم عليج وأكدر أشوفج؟ يافرحة من شافج ويامسعد من نضر بعيونج الحلوه ويامسعد من شاف الشامه اللي بخدج وشاف خدج الصافي وشفافج العسل وشعرج المثل الشلال يامسعد من سمع صوتج ياغاليه ياروحي ياعيني ياكلب كلبي يانبض كلبي ياروح روحي أحبج بشي جنوني آني ماأصدك نفسي أحبج أحبج أحبج وين إنتي دموعي سهله عليج ؟ إذكري هم فد يوم بجيتي وضميتج الصدري تعالي إرجعيلي مو فراغ البكلبي صار بكد الدنيا أخاف أعمه من البجي وبعد ما أشوفج ؟ أخاف أموت بإنفجار وبعد ما أشوفج راح يجي رمضان بعد كم يوم وإنتي بعيده . إحساس غريب يمتلكني بهاي الأيام بس لو أعرف إنتي وين وشوكت أشوفج جان إرتاحيت والله مداأنساج ولحد الآن عطرج بمخيلتي ... أحبج وداعت دموعي الغاليه أحبج ... أحبج وداعت عيني الكضت عمرهه تبجي عليج أحبج ... أحبج وداعت الشيب براسي على مودج أحبج... تدرين هسه إحنا برمضان وآني هسه هم دا أدعي ربي أن أشوفج وألكاج هسه ساعه خمسه إلا ربع الصبح أكتبلج هاي الرساله وأدعي ربي أن نرجع مثل قبل سويه مثل ماجنه نروح البحيرة الجادريه وناخذ ويانه جاي ولحم بعجين وناخذ صور بالموبايل وننطي أكل للسمج ونضحك وأبوسج وتبوسيني وينج إنتي الخاطر الله صحيح إختفت أيامج وإنتي إختفيتي جنت أصور إذا يضيع مني أصغر شي بالكره الأرضيه ألكاه !! هسه ضاع مني أغله شي مدا أعرف ألكاه ولا دا أعرف هو وين أصلا والضاع مني هو إنسان غالي عليه هو إنتي !! تصوري !!! ماأدري شأكول آني يمكن جيت أكدر ذكرياتي عليج طلعت أكبر من حجمج .. بس صدكيني أحبج وراح أبقى أحبج ومراح أزوج إلا إنتي ... قبل يومين حلمت : ( آني دا أنتضرج باب الكليه مالتج من الضهر لحد مصار الليل وإنتي ماكو تالي رجعت ) . حتى بأحلامي هم أنتضرج !! لو بس أعرف شوكت يخلص هذا الأنتضار كم يوم إجه وراح وكم إسبوع وشهر وكم صيف وشتا وإنتي ماكو ! حتى ولا صدفه تجمعنا سويه الله وأكبر ... لو تدرين شكد دعيت وطلبت من ناس تدعيلي وشكد نذرت وحتى هسه دا أختم القرآن لوجه الله بس ترجعيلي ونزوج ... قبل فتره شفت واحد بالشارع مضروب طلقه محد يقبل يشيله وأخذته آني وديته للمستشفى وبعدهه خابرت مرته وجهاله إجوي للمستشفى هو كال المرته هذا اللي شالني باوعت عليه مرته وكلتلي : ( الله يخليك الأهلك ويفتحه بوجهك وإنشالله التريده يصير وتاخذ بت الحلال ) . وجان موقف كلش صعب وبلحضتهه نزلت دمعتي لأن إذكرت بت الحلال إنتي . وحسيت دعتلي المره من كلب محروك ومن كل كلبهه حتى أمي مدعتلي هيج دعاء حسيت كلماتهه كل كلمه بيهه معنى جبير ضعت حسيت روحي جانت محتاجه لهذا الدعاء لأن أكيد راح يوصل لأن آني نقذت روح من الموت والنبي محمد (ص ) يكول : (هدم الكعبه ولا قتل مسلم ) . يعني آني أجري عند الله هو بناء الكعبه ... عالأقل هذا الموقف الصعب اللي ماكو أحد سواه غيري لأن الناس تخاف وجازفت وسويته جان لأجله ربي إستجاب دعائاتي ودعاء هاي العائله لمن دعولي من كلب محروك لأجل أبوهم وكلب فرحان لأجل إنقاذ حياته ... بس ماأعرف شنو سبب هذا طول الصبر لمن دعيت ربي هوايه بس شنو الفايده وإنتي لحد الآن بعدج بعيده عليه ؟!!! كل ما أفوت بشارع مشيناه سويه كلبي ينقبض وأذكر أيامنه ياريت لو الزمن يرجع وترجع الأيام الفاتت وإنتي يمي والوقت يضل على حاله حتى منفترك ويصير اللي صار ... حتى لمن أفوت من يم بيتكم أذكر لمن جنتي تنتضريني يم بيتكم وبراس الشارع هسه أفوت وماألكاج وبيتكم خالي أكول بلكي آني بحلم وبعدين أصحه منه وأثاري آني جنت أسعد إنسان بالدنيا وماأدري بنفسي يعني صحيح أخذج الزمن مني ؟ آني أبد ممصدك إرجعي وإسمعيني ولو مره وإفهمي الحقيقه وبعدين إحكمي تره الخصم ميصير هو الخصم وهو الحكم نفسه ... أحبج يمعوده والله أحبج إذا وصلتج هاي الرساله بأي طريقه أرجوج خابري وإذا رجعتي آني مستعد للزواج وهسه آني موضف وراتبي كلش زين صدكيني ممحتاج كلشي بس محتاج شوفتج راح أتخبل بكل مكان أروح أباوع بالوجوه أريد أشوفج شوكت وبيامكان راح نتلاكى شلون راح تجمعنه الصدفه وشراح تكول العيون أحبج ياأغلى من روحي ماأعرف وين أخلي صورتج قريبه عليه لوبعيده عني ماأدري شأسوي أزوج لوأبقه أنتضرج أخاف أزوج وبعدين نرجع وتصير المصيبه أكبر ؟ الناس أكلت راسي : إزوج إزوج . ها زوجت لو بعدك . هسه صار عمري 28 سنه وآني لحد الآن أنتضرج خايف ليكون نهاية صبري الفشل وخايف ليكون العكس بس ماعرف لحد ياوقت أبقى أنتضر حتى أعرف النتيجه البارحه هم حلمت بيج وهم حلمت أبجي عليج بالحلم وكعدت من النوم تعبان هلكت مابجيت عليج .. يعني إلى متى راح أبقه أحلم بيج مجرد حلم وإلى متى راح أبقه مشتاق أشوفج وأدور بالوجوه حتى أشوفج إلى متى ؟.. أتمنه أبوس العيون التشوفج وألف هنياله الشافج والحجيتي وياه وأروح فدوه لتراب التمشين عليه وأبوس الكاع التمشين عليهه بس تعالي وخلي أشوفج كافي عمري إنتي . حياتي بدونج ماإلهه معنى كلهه فراغ بفراغ صار كلشي ممل بس أفكر بيج وماعندي غير إنتي صار شكد مشايفج هسه شلون صارت ملامحج بعدهه عيونج حلوه ؟ بعده صبغ أضافرج وردي ؟ بعدج تحبين إلون البيجي ؟ بعدهه الشامه بخدج ؟ أكيد بعدهه . بعده شعرج طويل ؟ بعدهه إيدج ناعمه ودافيه ؟ شأريد أنسى منج عيني إنتي أمي وأبويه إنتي أروحلج فدوه تره يمكن تعبت وإنشالله ماأتعب بس وين ألكاج ؟ حتى صدفه مدا ألكاج يعني هيج صارت شوفتج صعبه عد الله . نص البشر شفتهم وتلاكيت وياهم إلا إنتي يمعوده يمعوده وينج صدك جذب مو راح أتخبل أحبج أحبج أحبج أحبج أحبج أحبج أحبج أحبج أحبج أحبج أحبج أحبج أحبج أحبج أحبج . كل ماشوف ثنين مخطوبين أنقهر أذكر شلون جنه آني وياج صرت من أشوف بنيه ولد يمشون سوه شي يصيح بداخلي يكلي : كله خلي يخطبهه قبل متروح منه . ومرات أكول خطيه ميدرون إشضاملهم القدر لأن جنت أحس نفسي أسعد إنسان وإنتي يمي والله جنت كلشي ممحتاج بس إنتي يمي كافي وتالي فجأه بعد عشرت سنين تختفين عني مثل نسمة هوه بعاصفه وين راح ألكاج وشلون وشوكت ؟ والله والله وأحشتني موت صدك جذب إلمن ألوم ؟ ألوم نفسي لو ألومج ؟ ألوم أهلي لو أهلج ؟ شنو الغيرج عليه راح يصير سنتين مشايفج ولاسامع صوتج وبعد كل هاي المده آني ممصدك إنتي ماكو يمي و أكول بلكت آني بحلم ! صرت أغالط نفسي وأصبرهه على بعدج صحيح يأست من شوفتج وبطلت أدور عليج بس مراح أكطع خيط الأمل قبل فتره دخلت للكليه مالتج لبست أحلى ملابس عندي وخليت أغلى عطر جنت فرحان وأكول شوكت يجي باجر الصبح حتى أروح للكليه عبالك راح باجر أشوفج لو متواعد وياج وثاني يوم رحت تخيلتج إنتي بيهه تركضين وتضحكين ويه صديقاتج ومشيت بكل ركن بالكليه وكلت أكيد فاتت من هذا الطريق لو ذاك وباوعت بالوجوه كلت بلكت ألكاج وجنت أعرف إنتي ماكو بس تصورت راح ألكاج ومرت إبالي كل ذيج الأيام الذهبيه الكضيناها سوه من جنت أوصلج للكليه وأرجع آخذج مرت بمخيلتي مثل شريط سينمائي مر إبالي بسرعه مثل ماهي مرت بسرعه ورجعت الضهر حزين لأن ملكيتج بالمكان إللي جنت ألكاج بيه يوميه . جنت من أوصلج الصبح للدوام أكول شوكت يجي الضهر حتى أشوفج . لج والله أحبج أحبج يعني حتى لو غلطت سامحيني مو حتى الله يسامح . المطربه شيرين تكول : ( طول البعاد لوعني ... وأنا عارفه إنو خدعني ... نسيني وهو نور عيني ) أحبج . ملاحضه : هذا جزئ قليل قليل من معناتي فما عانيته لايوصف والمصيبه إني لازلت أحبها فقد كتبته الى حبيببتي لعل تقرأه وتفهم حقيقة داخلي أكثر فالرجاء من يقرأها فلينشرها عن طريق ال ( Bluetooth‏ ) أو الأنترنت لأن هي تعرف عنواني ورقم هاتفي 07905599798
لعل تساعدوني في إيجادها أو إتصالها بي لأني فقدتها بسب مشكله عاطفيه وقد إنتقلوا الى بيت آخر لاأعرف أين وقد بحثت عنها ولم أجدها وأنت تعرف أيها القارئ العزيز ضرف بغداد في الوضع الأمني الراهن والتنقل من منطقه إلى منطقه أخرى وصعوبة البحث والسؤال في ظل هذه الضروف فالرجاء نشر هذه الرساله وجزاكم الله خير الجزاء .................: المعذب .

منقول للأمانة

**°•أَحَآسٍيس أنُوثـَه•°** · 04-29-2008, 05:29 PM

قصهـ جميلهـ
ورائعه لكن مكانها
في القصص
تحياتي

**وطن الغربة** · 05-10-2008, 07:24 PM

يسلمواااااااا وين الردود

الرئيسية	المنتدى	سمايلز	استعلام الايبي ip	العاب فلاش
سرعة اتصالك	حكم والامثال	مسجات	مركز تحميل	زخرفه الاسم

لوحة الشرف
المشرف المميز	الموضوع المميز	العضو المميز
CANON**ROCK	قصيدتي في مدح رسول الله	جكليته العراقيه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
¤¦[ قصص حقيقية حدثت اثناء الوفاة (سبحان الله) ]¦¤	ج ــوآن	كان ياما كان	18	05-17-2008 05:58 PM
صورة حقيقية للرسول ( ص ) ... متع ناظريك	۩ ۩\|\|[−ـ‗_ عآزف الليل _‗ـ−]\|\| ۩ ۩	دينك أساسك	16	03-29-2008 09:25 PM
فيلم American Gangster قصة حقيقية - مترجم	₪ Van Persie ₪	الأفلام العربية والأجنبية	12	02-28-2008 04:03 AM
سحر الخادمات بعرضي قصة حقيقية وتخوف ديرو بالكم	akon	كان ياما كان	1	01-10-2008 03:52 PM
القرار الاخير	المبرمجه العراقيه	همس القوافي وبوح الخواطر	9	11-21-2007 02:13 PM

الذين يشاهدون محتوى الموضوع الآن : 1 ( الأعضاء 0 والزوار 1)

إعلانات الموقع